Chapter 1: “Kon?”
Woh waqt yaad hai jab ₹249 mein sirf 1GB data milta tha, woh bhi 28 din ke liye. Us zamane mein data kisi khazane se kam nahi hua karta tha. Gaon ke logon ke liye internet ek ajnabi cheez thi. Phone ka istemal sirf baat-cheet tak simit tha—”hello”, “haan sunaao”, ya kabhi kabhi ek-do missed call. Whatsapp, YouTube, Facebook—ye sab shabd bhi logon ke liye naye the. Realiance Jio ka toh naam bhi kisi ne nahi suna tha. Us waqt Har MB ki keemat hoti thi.
Isi digital andhera mein chhupi hui thi ek kahani… Rajib aur Roma ki kahani.
O kahani jise likhi thi kismat ne. Ek number. Ek “Hi”, intezaar, aur jazbaat ke beech… Rajib aur Roma ki.
Lekin kismat, apna khel khelne ko tayar thi. Shayad usne kuchh aur hi soch rakha tha.
Ek aisi kahani jo kisi trending reel se nahi, balki ek simple “Hi” se shuru hone wali thi. Ek unseen profile pic, ek chhupa hua contact number aur ek ajnabi ladka jo apne phone ke screen par kisi anjaani muskaan ki tasveer dhoond raha tha. Internet toh tha, par connection sirf signals ka nahi, dil ka lagne wala tha.
Rajib, Dalgaon ke ek chhote se gaon ka ladka tha. Uske pita kaafi sakht the, ek kadak anushasan mein jeene wale aadmi. Rajib ek seedha-saadha, sharif aur thoda shant swabhav ka ladka tha. Bas 10vi paas ki thi, aur ab 11vi mein admission liya tha. Usne Birpara naam ke chhote se sheher mein ek computer training centre—”Learner Computer Academy”—mein admission le liya. Technology usse hamesha se attract karti thi. Machines, software, keyboard ka click-click karna—ye sab usse jaadu jaise lagta tha.
Yahin pe uski mulaqat hui Subham se. Subham, usse chaar saal bada tha. Dimdima naam ke ek doosre gaon se tha. Thoda smart, thoda street-wise, aur technology ka deewana. Pehli mulaqat mein hi dono ka tech ke liye junoon jhalak gaya tha. Dheere dheere, dono ki dosti gehri hone lagi. Sir bhi unhe pasand karne lage the. Jab bhi koi computer kharab hota, sir kehte: “Rajib, Subham, sambhalo ise.” Aur dono milke computer ko repair karte.
Baki students ko wifi ka password bhi nahi diya jaata tha, par Rajib aur Subham ko full access tha. Unka chhota sa tech world ban gaya tha. Sir bhi unhe student nahi, doston ki tarah treat karte the. Subah ki class ke baad nikalte, raste mein ek chhoti si thela momo shop milti thi—aloo momo, paneer momo, aur kabhi kabhi chicken momo. Dhoondh kar apni pasand ka chutney banana, aur garam momo ke saath baith kar college ki choti-badi baatein karna—ye unke dosti ka ek ankahee hissa ban gaya tha. Wahi momo corner unka adda ban gaya tha.
Ek din, kuch research karne ke liye Subham ne apna Gmail Rajib ke phone mein login kiya. Rajib ne kuch khaas socha nahi, par jab ghar jaake phone dekha, toh uske contacts list mein kuch naye numbers add ho gaye the. Pehle toh Rajib hairaan hua, fir curious.
Agle din class mein usne Subham se kaha, “Bhai, mere phone mein naye numbers aa gaye hain. Jo shayad tumhare Gmail dalne se add ho gaye hain. Ye kis ke hain?”
Subham ne ek ek naam padh kar bataya, “Ye Amrita hai—meri cousin. Ye Priya, tuition wali. Ye Moumita, school friend…”
Aur phir ek naam aaya… Roma.
“Ye kaun hai?” Rajib ne poocha.
Subham thoda sa ruk gaya. “Ladki hai,” usne short mein jawab diya.
Rajib hans pada, “Naam se to mujhe bhi pata chal raha hai bhai.”
Par Subham us baare mein aur kuch kehne se katra gaya. Uske lehje mein kuch aisa tha jaise woh Roma ke baare mein zyada baat nahi karna chahta ho. Rajib ka curiosity aur badh gaya. Kyun nahi batana chahta? Kya khaas hai is Roma mein?
Raat ko, padhai khatam karne ke baad, Rajib bed pe lete hue mobile dekh raha tha. Roma ka naam bar-bar uske dimaag mein aa raha tha. Itni saari ladkiyon ke naam uske phone mein the, par sirf Roma ka hi naam tha jo dil ke kisi kone mein halki si halchal kar gaya tha. Naam kuch alag tha, kuch madhur—jaise kisi purani kavita ki ek madhur pankti.
Usne WhatsApp khola. Roma ka number search kiya. Profile aayi, lekin Profile picture nahi thi. “Chhupi huyi hai,” Rajib ne socha. Yeh aur bhi ajeeb laga.
Agle din, Computer Center me usne Subham se pucha, “Message karu kya?”
Subham haanste hue bola, “Woh tumhe reply v nahi degi.”
Dono hans diye. Baat khatam ho gayi. Momo khaya, ghar gaye.
Lekin Rajib ka dimaag abhi bhi usi ek naam mein uljha hua tha—Roma.
Us raat, mobile haath mein lekar, usne socha, “Ek baar message bhej kar dekhte hain… kya jaata hai.”
Usne type kiya: “Hi” send karne se pahle thora kuchh socha sayad o dar raha tha fir send kar diya.
Message turant deliver ho gaya.
5 minute… 10 minute… koi reply nahi.
Rajib ne socha, “Shayad busy hogi.”
Usne computer centre se ek movie download ki thi, wahi dekh kar so gaya.
Agla din, puri tarah se aam tha—lekin Rajib ke andar kuchh badal raha tha. School gaya, cricket bhi khela, doston ke saath hansa. Par har pal, uske dimaag ke ek kone mein wahi ek message ghoom raha tha… jo ab tak ‘seen’ bhi nahi hua tha. Shaam ko thaka-manda ghar laut kar, jaise hi WhatsApp khola, uska dil halka sa dhadka—lekin screen pe wahi purana status: “unseen.”
Dil ne phir se ek baar himmat jutayi. Is baar usne likha: “Hello.”
Message deliver hua… aur phir ek gehra sannata.
Woh bhi deliver ho gaya. Phir wahi intezaar. 1 ghanta… 2 ghanta…
“Subham sahi bol raha tha… reply nahi degi,” usne socha. Gaana chalu kiya aur thori der baad so gaya.
Agla din bhi waise hi beeta. Routine zindagi chalti rahi. Lekin dil ke ek kone mein Roma ka naam chhupa hua tha.
Aur phir… woh raat aayi.
Raat ke 7:10 baje. Rajib apne bed par pada tha. Mobile haath mein tha. Uska dil aur dimaag ladaai kar rahe the.
“Message karu ya nahi?”
Usne khud se kaha, “Bas aaj last baar… agar is baar reply nahi aaya, toh kabhi message nahi karunga.”
Usne likha: “hlw?”
Message deliver ho gaya. 5 minute… 10 minute… koi reply nahi.
Rajib ne phone side mein rakha, YouTube pe ek video song chalu kiya.
7:33 PM.
Mobile vibrate karta hai. Rajib ne lazily phone uthaya.
Ek message tha:
“Kon?”
Rajib ki aankhein wide ho gayi. Woh turant message kholta hai.
Naam dekhta hai — Roma.
Ek shabd… ek message… aur zindagi ki poori kahani palatne wali thi.Par kya yeh kahani ek nayi shuruaat thi… ya kisi dard bhare anjaam ki dastak?
End of Chapter 1
Lekin asli kahani toh ab shuru hone wali thi…
CTA
Pasand aayi Rajib aur Roma ki kahani?
💌 Isse apno ke saath zaroor share karein — Shayad kisi ki yaadon se milti ho.
👍 Aur agar aap aise hi dil-chhoo jaane waali kahaniyan padhna chahte hain, to hamare
Facebook page ko like karein – https://www.facebook.com/people/E-Vichar/61577438743345/
Pyaar Mein Girna ya Falling in Love — Jab Aap Uske Bina Nahi Rah Paate
