Chapter 2 : Roma
Kahani aksar bade faislon se nahi banti…
Woh banti hai chhoti-chhoti tasveeron se,
Adhuri mulaqaton se,
Aur un lafzon se —
Jo kabhi keh nahi paaye, par kahi kisi kone mein chupke se rukh jaate hain.
Kabhi ek message…
Kabhi ek naam…
Aur kabhi ek ajnabi muskaan —
Jo bina ijazat, bina awaaz ke,
Andar kahin… bas jaati hai.
Aur waha se ek nayi kahani… chupke se janm leti hai.
Jaise Rajib aur Roma ki kahani.
Roma ek seedhi-saadhi, simple si ladki thi.
Na zyada bolti thi, na kuch dikhawa karti.
Thoda sa chup, thoda sa apne mein rehne wali.
Zindagi se zyada kuchh umeedein nahi thi,
Par har din ki zimmedaariyon ne usse kuch zyada hi samajhdaar bana diya tha.
Uska ek bada bhai tha — Vishal.
Jo usse chaar saal bada tha, aur aksar padhai aur kaam ke silsile mein ghar se door rehta tha.
Chhoti behan Radha thi — jo Roma se teen saal chhoti thi.
March ka mahina tha.
Thand abhi poori tarah gayi nahi thi.
Usi Maa aksar bimar rehti thi,
Aur isliye ghar ke zyada tar kaam Roma ke zimmedaari ban chuki thi.
Woh kabhi kisi se shikayat nahi karti thi —
Na apne bojh se, na zindagi ki thakan se.
Bas ek hi dua hoti thi uske dil mein:
“Bas meri maa theek ho jaaye… aur kuch bhi nahi chahiye mujhe.”
Yahi uski har raat ki dua thi,
Aur har subah ka intezaar.
Na koi kehne layak sapne the,
Na apne liye koi shikayat.
Kabhi-kabhi woh apne khayalon ko diary mein likhne baithti,
Lekin likhne se pehle hi pen ka dhakkan band kar deti —
Jaise dar ho, ki kahin koi padh na le.
Roma kisi ajnabi se yunhi baat kar le —
Yeh uske liye aam baat nahi thi.
Na hi woh kisi ka reply aasani se deti thi.
Uske dil mein jaise ek invisible lock laga tha,
Aur uska password shayad usne khud bhi bhool diya tha.
Phir ek din… ek simple sa “Hi” aaya.
Roma ne sirf ek baar dekha.
Aur bina kuch soche — us message ko ignore kar diya.
Jaise koi khayal jo dil ke darwaze tak to aaya ho…
Lekin knock na kar paaya.
Do din beet gaye the.
Wahi message, wahi screen —
Bilkul waisa hi padha tha jaise koi purana panna,
Jo kab ka likha gaya ho,
Par kabhi padha hi na gaya ho.
Teesra din tha…
Raat ke karib 7.14 me
phir wahi unknown larke ki messeage aati hai.
Roma ne casually screen swipe kiya,
Aur message hata diya.
Par kuch hi pal baad ek khayal aaya —
‘Kaun ho sakta hai baar-baar message kar raha hai?’
tabhi ek ajeeb si curiosity us ke man me jagi.
“Dekh hi leti hoon… baar-baar message kar raha hai to koi jaan-pehchaan ka hi hoga.”
Usne WhatsApp khola.
Profile picture pe tap kiya.
Ek pal ke liye… Roma ruk gayi. Jaise screen pe koi chehra nahi, koi yaad ho.
Ek chehra saamne tha —
Masoom sa, aankhen thodi badi,
Halki si muskaan, aur thoda awkward sa expression.
Roma kuch der tak dekhti rahi.
Na jaane kyun, us tasveer mein kuch tha…
Kuch aisa, jo jaana-pehchaana bhi laga… aur ajnabi bhi.
Jaise ek purani yaad —
Jo yaad to na ho, par mehsoos hoti ho.
“Kaun hai ye chhota sa ladka? Mere age ka to nahi lagta… Mujhe yaad nahi ki maine isse kabhi dekha ho…”
Phir ek soch ubhri —
“Kahin Radha to ise nahi jaanti?”
Roma ne turant awaaz lagayi:
“Radhaaa… ek second, idhar aana.”
Radha — chhoti behan, paas aayi aur boli,
“Ha didi, bolo.”
Roma ne mobile uske saamne kiya:
“Yeh ladka… dekha hai kabhi?”
Radha ne tasveer ko zoom kiya, thoda tilt kiya…
Aur casually boli:
“Nahi didi, pehli baar dekh rahi hoon.”
Roma ne sir hilaaya “thik hai”.
Radha wapas chali gayi.
Roma thodi der chup rahi.
Aankhon mein halka sa confusion tha…
Par kahin andar ek naya sa ehsaas bhi.
Jaise kisi shaant zindagi mein kisi ne halki si dastak di ho.
“Pata nahi kaun hai… par agar baar-baar likh raha hai, to poochh hi leti hoon.”
Roma ne finally type kiya:
“Kaun?”
Raat ke 7:33 par message deliver hota hai.
Rajib message kholta hai.
Na jaane kyun —
Uski heartbeat… ekdum se tez ho jaati hai.
Kya kabhi aapki dhadkan kisi ke pehle message, pehli call, ya pehli mulaqat mein tez ho gayi thi? Apna anubhav zarur batayein.
End of Chapter 2
Main yahan is chapter ka ant to nahi karna chahta tha,lekin yeh chapter kaafi lamba ho gaya hai.Milte hain agle chapter mein
Follwo on Facebook page : https://www.facebook.com/people/E-Vichar/61577438743345/
Wattpad English Book Link: https://www.wattpad.com/story/398349670-rajib-roma-a-strange-love-story
Ek ‘Hi’ Se Shuru Hui Rajib aur Roma Ki Ajeeb Si Prem Kahani : Chapter 1 – Kon?
